kahaan main abhi tak nazar aa sakaa huun — Dil Ayubi

ye dilchasp vaade ye rangin dilaase
ajab saazishein hain kahaan aa gayaa huun

ye raah-e-ishq hai aakhir koi mazaaq nahin
saubaton se jo ghabraa gae hon ghar jaaein

is shahr mein to kuchh nahin rusvaai ke sivaa
ai 'dil' ye ishq le ke kidhar aa gayaa tujhe

lamha lamha mujhe viraan kiye detaa hai
bas gayaa mere tasavvur mein ye chehra kis kaa

phir marhala-e-khvaab-e-bahaaraan se guzar jaa
mausam hai suhaanaa to garebaan se guzar jaa

hasin hai shahr to ujlat mein kyuun guzar jaaein
junun-e-shauq use bhi nihaal kar jaaein

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

jaane kyaa soch ke phir in ko rihaai de di
ham ne ab ke bhi parindon ko tah-e-daam kiyaa

jaan dene kaa hunar har shakhs ko aataa nahin
sohni ke haath mein kachchaa ghaDaa thaa dekhte