main chup rahtaa huun itnaa bol kar bhi — Fahmi Badayuni

kaash vo raaste mein mil jaae
mujh ko munh pher kar guzarnaa hai

khuun pilaa kar jo sher paalaa thaa
us ne circus mein naukri kar li

pareshaan hai vo jhuTaa ishq kar ke
vafaa karne ki naubat aa gai hai

Tahalte phir rahe hain saare ghar mein
tiri khaali jagah ko bhar rahe hain

aaj paivand ki zarurat hai
ye sazaa hai rafu na karne ki

puchh lete vo bas mizaaj miraa
kitnaa aasaan thaa ilaaj miraa

main baDaa ho gayaa huun magar bachpanaa
mere dil se kabhi bhi gayaa hi nahin

vo arz-e-gham pe miri un kaa ehtimaam-e-sukut
tamaam shorish-e-tafsil-e-vaaqiaat gai

nazar jhuk rahi hai khamoshi hai lab par
hayaa hai adaa hai ki an-ban hai kyaa hai

ek muddat se khamoshi kaa hai pahra har-su
jaane kis or gae shor machaane vaale

kabhi kabhi chup ho jaane ki khvaahish hoti hai
aaise mein jab tir-e-sitam ki baarish hoti hai

vo ek shakhs to patthar uchhaal kar chup hai
samundaron se abhi tak sadaaein aati hain