ek muddat se khamoshi kaa hai pahra har-su — Kausar Mazhari

mausam-e-dil jo kabhi zard saa hone lag jaae
apnaa dil khuun karo phuul ugaane lag jaao

giraa thaa bojh koi sar se mere
usi ko phir uThaanaa chaahtaa huun

vahi qatra jo kabhi kunj-e-sar-e-chashm mein thaa
ab jo phailaa hai to sailaab huaa jaataa hai

jaane kis khvaab-e-pareshaan kaa hai chakkar saaraa
bikhraa bikhraa huaa rahtaa hai miraa ghar saaraa

nazar jhuk rahi hai khamoshi hai lab par
hayaa hai adaa hai ki an-ban hai kyaa hai

putliyon par raqs karnaa hi kalaam-e-fan nahin
dard ke aansu ko to paiham ravaani chaahiye

main baDaa ho gayaa huun magar bachpanaa
mere dil se kabhi bhi gayaa hi nahin

miri maili hatheli par to bachpan se
gharibi kaa kharaa sonaa chamaktaa hai

sab honge us se apne taaaruf ki fikr mein
mujh ko mire sukut se pahchaan jaaegaa

ufuq pe yaadon ke zard aanchal mein lipTaa suraj
aur us pe shaamon ke saath Dhalti 'ajib si chup

ik salib-e-vaqt par sayyad himaayat mein miri
jab koi bolaa nahin main intiqaaman chup rahaa

baarish hui to ghar ke dariche se lag ke ham
chup-chaap sogvaar tumhein sochte rahe