vo aql-mand kabhi josh mein nahin aataa — Farhat Ehsas

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

ilaaj apnaa karaate phir rahe ho jaane kis kis se
mohabbat kar ke dekho naa mohabbat kyuun nahin karte

main ronaa chaahtaa huun khuub ronaa chaahtaa huun main
phir us ke baad gahri niind sonaa chaahtaa huun main

har gali kuche mein rone ki sadaa meri hai
shahr mein jo bhi huaa hai vo khataa meri hai

tamaam paikar-e-badsurti hai mard ki zaat
mujhe yaqin hai khudaa mard ho nahin saktaa

koi dariyaa ki taraf jaane ko tayyaar nahin
haath sab ke hain magar koi 'alam-daar nahin

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

gaaDi mein bhi ghar ko soche jaataa huun
gaaDi aage aur main pichhe jaataa huun

ikaTThe kar ke teri dusri tasvir khinchungaa
vo sab jalve jo chhan chhan kar tiri chilman se nikleinge

'taabish' jo guzarti hi nahin shaam ki had se
sochein to vahin raat sahar-khez bahut hai

soch un ki kaisi hai kaise hain ye divaane
ik makaan ki khaatir jo sau makaan jalaate hain