ik maasum parinda hai dil — Farzana Naz

ye tasavvur hi jaan levaa hai
vo kisi aur kaa hai meraa nahin

mujh pe aasaan ho gayaa thaa vo
vo bhi urdu mein baat kartaa thaa

ik hamaari sadaa thi is ban mein
lo ji khaamosh ho gae ham bhi

hijrat mujh se lipaT gai hai
paanv mein kitne aur safar hain

shahr mein ham saa bhi nahin koi
ik vahi be-misaal thoDi hai

hain udaasi ke aur bhi asbaab
mujh ko teraa malaal thoDi hai

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

thaa safar ham pe musallat so hamein chalnaa thaa
varna ye dil to kai baar huaa ruk jaate

insaan ke dil ko hi koi saaz nahin hai
kis parde mein varna tiri aavaaz nahin hai

apne hone se bhi inkaar kiye jaate hain
tere hone kaa yaqin khud ko dilaate hue ham

naam honTon pe tiraa aae to raahat si mile
tu tasalli hai dilaasa hai duaa hai kyaa hai