vo jis kaa naam paDaa hai khamosh logon mein — Fawad Ahmad

dil o nazar ki baqaa hai faqat mohabbat mein
dil o nazar se koi aur kaam mat lenaa

jo palkon se gir jaae aansu kaa qatra
jo palkon mein rah jaaegaa vo guhar hai

be-kaif kaT rahi thi musalsal ye zindagi
phir khvaab mein vo khvaab saa paikar milaa mujhe

ruThe logon ko manaane mein maza aataa hai
jaan kar aap ko naaraaz kiyaa hai main ne

tum mujhe chhoD ke is tarah nahin jaa sakte
is ta'alluq pe bahut naaz kiyaa hai main ne

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

vo saamne hain magar tishnagi nahin jaati
ye kyaa sitam hai ki dariyaa saraab jaisaa hai

main hairat o hasrat kaa maaraa khaamosh khaDaa huun saahil par
dariyaa-e-mohabbat kahtaa hai aa kuchh bhi nahin paayaab hain ham

nigaahon ke manaazir be-sabab dhundhle nahin paDte
hamaari aankh mein dariyaa koi Thahraa huaa hogaa

chashm-e-tar ne bahaa ke ju-e-sarishk
mauj-e-dariyaa ko dhaar par maaraa

ik khitta-e-khun mein kahin dariyaa ke kinaare
divaar-e-zamaana se giraa dhyaan phisal kar