be-kaif kaT rahi thi musalsal ye zindagi — Fawad Ahmad

dil o nazar ki baqaa hai faqat mohabbat mein
dil o nazar se koi aur kaam mat lenaa

jo palkon se gir jaae aansu kaa qatra
jo palkon mein rah jaaegaa vo guhar hai

ruThe logon ko manaane mein maza aataa hai
jaan kar aap ko naaraaz kiyaa hai main ne

tum mujhe chhoD ke is tarah nahin jaa sakte
is ta'alluq pe bahut naaz kiyaa hai main ne

vo jis kaa naam paDaa hai khamosh logon mein
yahaan pe lafzon ke dariyaa bahaa rahaa thaa abhi

kam-umri mein sunet hain
mar jaate hain achchhe log

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

idhar to tuul diyaa hai umiid ko us ne
udhar hayaat ataa ki hai mukhtasar mujh ko

zindagi tu bhi hamein vaise hi ik roz guzaar
jis tarah ham tujhe barson se guzaare hue hain