khaak-e-'shibli' se khamir apnaa bhi uTThaa hai 'fazaa' — Faza Ibn E Faizi

vaqt ne kis aag mein itnaa jalaayaa hai mujhe
jis qadar raushan thaa main us se sivaa raushan huaa

har ik qayaas haqiqat se dur-tar niklaa
kitaab kaa na koi dars mo'tabar niklaa

kisi lamhe to khud se laa-taalluq bhi raho logo
masaail kam nahin phir zindagi bhar sochte rahnaa

shab-gazida ko tire is ki khabar hi kab thi
din jo aaegaa gham-e-laa-mutanaahi degaa

kis tarah umr ko jaate dekhun
vaqt ko aankhon se ojhal kar de

palkon par apni kaun mujhe ab sajaaegaa
main huun vo rang jo tire paikar se kaT gayaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

jab kabhi chaahaa likhun jhiil tiri aankhon ko
tairne lagte hain khushbu ke kanval kaaghaz par

kab tak paDe rahoge havaaon ke haath mein
kab tak chalegaa khokhle shabdon kaa kaarobaar

har ek raat ko mahtaab dekhne ke liye
main jaagtaa huun tiraa khvaab dekhne ke liye