gham-e-dauraan mein kahaan baat gham-e-jaanaan ki — Fazl Ahmad Kariim Fazli

hamaare un ke ta'alluq kaa ab ye aalam hai
ki dosti kaa hai kyaa zikr dushmani bhi nahin

hai sakht mushkil mein jaan saaqi pilaae aakhir kidhar se pahle
sabhi ki aankhein ye kah rahi hain idhar se pahle idhar se pahle

ahl-e-hunar ke dil mein dhaDakte hain sab ke dil
saare jahaan kaa dard hamaare jigar mein hai

aankhon kaa to kaam hi hai ronaa
ye girya-e-be-sabab hai pyaare

naqaab un ne rukh se uThaai to lekin
hijaabaat kuchh darmiyaan aur bhi hain

fareb-e-karam ik to un kaa hai is par
sitam meri khush-fahmiyaan aur bhi hain

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ye saal tul-e-masaafat se chuur chuur gayaa
ye ek saal to guzraa hai ik sadi ki tarah

hijr ki shab naala-e-dil vo sadaa dene lage
sunne vaale raat kaTne ki duaa dene lage

us pe qurbaan ki jis ne tiri aavaaz suni
sadqe us aankh ke jis ne tiraa jalva dekhaa