kyaa milaa arz-e-muddaaa se 'figaar' — Figar Unnavi

maayus dilon ko ab chheDo bhi to kyaa haasil
TuuTe hue paimaane fariyaad nahin karte

fazaa kaa tang honaa fitrat-e-aazaad se puchho
par-e-parvaaz hi kyaa jo qafas ko aashiyaan samjhe

dil hai miraa rangini-e-aaghaaz pe maail
nazron mein abhi jaam hai anjaam nahin hai

ik teraa aasraa hai faqat ai khayaal-e-dost
sab bujh gae charaagh shab-e-intizaar mein

un pe qurbaan har khushi kar di
zindagi nazr-e-zindagi kar di

partav-e-husn se zarre bhi bane aaine
kitne jalve kiye arzaan tiri raanaai ne

hamaari naav ki qismat mein shaayad
kisi buDhe shajar ki bad-du'aa hai

uThe hain haath to apne karam ki laaj bachaa
vagarna meri duaa kyaa miri talab kyaa hai

yuun saraapaa iltijaa ban kar milaa thaa pahle roz
itni jaldi vo khudaa ho jaaegaa sochaa na thaa

muddaaa duur tak gayaa lekin
aarzu lauT kar nahin aai

puchhte kyaa ho muddaaa kyaa hai
khud samajh jaao puchhnaa kyaa hai

jaane kab se haath baandhe kar rahaa huun iltijaa
ab to meri baat par aamin kah de zindagi