ghar se baahar nahin niklaa jaataa — Fuzail Jafri

zahr miThaa ho to piine mein mazaa aataa hai
baat sach kahiye magar yuun ki haqiqat na lage

dasht-e-tanhaai mein jiine kaa saliqa sikhiye
ye shikasta baam-o-dar bhi ham-safar ho jaaeinge

bose biivi ke hansi bachchon ki aankhein maan ki
qaid-khaane mein giraftaar samajhiye ham ko

koi manzil aakhiri manzil nahin hoti 'fuzail'
zindagi bhi hai misaal-e-mauj-e-dariyaa raah-rau

bhule-bisre hue gham phir ubhar aate hain kai
aaina dekhein to chehre nazar aate hain kai

aaThon pahr lahu mein nahaayaa kare koi
yuun bhi na apne dard ko dariyaa kare koi

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

na ab vo yaadon kaa chaDhtaa dariyaa na fursaton ki udaas barkhaa
yunhi zaraa si kasak hai dil mein jo zakhm gahraa thaa bhar gayaa vo

hamein jo yaad hai ham to usi se kaam lete hain
kisi kaa naam lenaa ho usi kaa naam lete hain

dosti kis ki rahi yaad vo kis par bhulaa
dusraa biich mein kaun aa ke maraa mere baad

khatm karnaa chaahtaa huun pech-o-taab-e-zindagi
yaad-e-gesu zor-e-baazu ban mire shaane mein aa