dasht-e-tanhaai mein jiine kaa saliqa sikhiye — Fuzail Jafri

aaThon pahr lahu mein nahaayaa kare koi
yuun bhi na apne dard ko dariyaa kare koi

zahr miThaa ho to piine mein mazaa aataa hai
baat sach kahiye magar yuun ki haqiqat na lage

bose biivi ke hansi bachchon ki aankhein maan ki
qaid-khaane mein giraftaar samajhiye ham ko

koi manzil aakhiri manzil nahin hoti 'fuzail'
zindagi bhi hai misaal-e-mauj-e-dariyaa raah-rau

bhule-bisre hue gham phir ubhar aate hain kai
aaina dekhein to chehre nazar aate hain kai

ghar se baahar nahin niklaa jaataa
raushni yaad dilaati hai tiri

jab ki pahlu se yaar uThtaa hai
dard be-ikhtiyaar uThtaa hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

main ne apni palkon par gham-kade sajaae hain
aarzu ke maatam mein sogvaar hasti hai

ham haal to kah sakte hain apnaa pa kahein kyaa
jab vo idhar aate hain to tanhaa nahin aate