ye dard hai hamdam usi zaalim ki nishaani — Hakeem Nasir

vo mujhe chhoD ke ik shaam gae the 'naasir'
zindagi apni usi shaam se aage na baDhi

jab se tu ne mujhe divaana banaa rakkhaa hai
sang har shakhs ne haathon mein uThaa rakkhaa hai

pattharo aaj mire sar pe baraste kyuun ho
main ne tum ko bhi kabhi apnaa khudaa rakkhaa hai

ghar mein jo ik charaagh thaa tum ne use bujhaa diyaa
koi kabhi charaagh ham ghar mein na phir jalaa sake

aasaan kis qadar hai samajh lo miraa pata
basti ke baad pahlaa jo viraana aaegaa

aap kyaa aae ki rukhsat sab andhere ho gae
is qadar ghar mein kabhi bhi raushni dekhi na thi

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

husn jalva dikhaa gayaa apnaa
ishq baiThaa rahaa udaas kahin

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

main ne apni palkon par gham-kade sajaae hain
aarzu ke maatam mein sogvaar hasti hai