yaadon ki rut ke aate hi sab ho gae hare — Sheen Kaaf Nizam

vahshat to sang-o-khisht ki tartib le gai
ab fikr ye hai dasht ki vusat bhi le na jaae

nikle kabhi na ghar se magar is ke baavajud
apni tamaam umr safar mein guzar gai

darvaaza koi ghar se nikalne ke liye de
be-khauf koi raasta chalne ke liye de

chubhan ye piiTh mein kaisi hai muD ke dekh to le
kahin koi tujhe pichhe se dekhtaa hogaa

gali ke moD se ghar tak andheraa kyuun hai 'nizaam'
charaagh yaad kaa us ne bujhaa diyaa hogaa

udaasi akele mein Dar jaaegi
ghaDi-do-ghaDi ko khushi bhej de

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

vo bhiiD mein khaDaa hai jo patthar liye hue
kal tak miraa khudaa thaa mujhe itnaa yaad hai

shab kitni bojhal bojhal hai ham tanhaa tanhaa baiThe hain
aise mein tumhaari yaad aai jis tarah koi ilhaam aae

kabhi to sard lagaa dopahar kaa suraj bhi
kabhi badan ke liye ik kiran ziyaada hui

safar kaa marhala-e-sakht hi ghanimat thaa
Thahar gae to badan ki thakan ziyaada hui