nigaah-e-shauq agar dil ki tarjumaan ho jaae — Haya Lakhnavi

aah ye barsaat kaa mausam ye zakhmon ki bahaar
ho gayaa hai khun-e-dil aankhon se jaari in dinon

chaman vahi hai ghaTaaein vahi bahaar vahi
magar gulon mein vo ab rang-o-bu nahin baaqi

rahein gham ki sharar-angeziyaan yaa-rab qayaamat tak
'hayaa' gham se na milti gar kabhi fursat to achchhaa thaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

ham ne saaraa jivan baanTi pyaar ki daulat logon mein
ham hi saaraa jivan tarse pyaar ki paai paai ko

shaaeri ishq gham rizq kitaabein ghar-baar
kitni samton mein ba-yak-vaqt guzar hai meraa

aane vaalon ki mohabbat hi bahut hai mujh ko
jaane vaalon se kahaan koi shikaayat hai mujhe