gharib shakhs ko miltaa nahin kisi bhi tarah — Hilal Badayuni

maujud mere dil mein jo zakhmon ke daagh hain
vo ek bevafaa ke sitam ke charaagh hain

maza to jab hai ki dil kaa andheraa miT jaae
gharon mein laakh charaaghaan kiyaa kare koi

sirf rishta nahin ek ehsaas hai
duur ho kar bhi maan to mire paas hai

kuchh aur de na paae zamaane ko ham 'hilaal'
paighaam-e-amn deinge isi shaaeri se ham

jab chhuaa hogaa us ne phulon ko
hosh khushbu ke uD gae honge

tumhaare saamne jazbaat saare khol saktaa huun
jo sunnaa chaahte ho tum main vo bhi bol saktaa huun

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

ham to apnon se bhi begaana hue ulfat mein
tum jo ghairon se mile tum ko na ghairat aai