sirf rishta nahin ek ehsaas hai — Hilal Badayuni

maujud mere dil mein jo zakhmon ke daagh hain
vo ek bevafaa ke sitam ke charaagh hain

maza to jab hai ki dil kaa andheraa miT jaae
gharon mein laakh charaaghaan kiyaa kare koi

kuchh aur de na paae zamaane ko ham 'hilaal'
paighaam-e-amn deinge isi shaaeri se ham

gharib shakhs ko miltaa nahin kisi bhi tarah
ye ishq ho gayaa sarkaari naukri ki tarah

jab chhuaa hogaa us ne phulon ko
hosh khushbu ke uD gae honge

tumhaare saamne jazbaat saare khol saktaa huun
jo sunnaa chaahte ho tum main vo bhi bol saktaa huun

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

pyaaso raho na dasht mein baarish ke muntazir
maaro zamin pe paanv ki paani nikal paDe