le jaae jahaan chaahe havaa ham ko uDaa kar — Iftikhar Raghib

inkaar hi kar dijiye iqraar nahin to
uljhan hi mein mar jaaegaa bimaar nahin to

'raaghib' vo meri fikr mein khud ko bhi bhuul jaaein
aisi to koi baat nahin chaahtaa thaa main

ji chaahtaa hai jiinaa jazbaat ke mutaabiq
haalaat kar rahe hain haalaat ke mutaabiq

din mein aane lage hain khvaab mujhe
us ne bhejaa hai ik gulaab mujhe

ek mausam ki kasak hai dil mein dafn
miThaa miThaa dard saa hai mustaqil

paDhtaa rahtaa huun aap kaa chehra
achchhi lagti hai ye kitaab mujhe

main mar jaaun to meri ek alag pahchaan likh denaa
lahu se meri peshaani pe hindustaan likh denaa

yahi vo din the jab ik dusre ko paayaa thaa
hamaari saal-girah Thiik ab ke maah mein hai

main ne us had se guzarne ki bahut koshish ki
jis jagah rang se tasvir alag hoti hai

gavaaraa hi na thi jin ko judaai meri dam-bhar ki
unhin se aaj meri shakl pahchaani nahin jaati

umr bhar sang-zani karte rahe ahl-e-vatan
ye alag baat ki dafnaaeinge eazaaz ke saath

un ki hazaar koshishein aur zid alag rahi
apni to DeDh iinT ki masjid alag rahi