zaalim hamaari aaj ki ye baat yaad rakh — Imdad Ali Bahr

qaazi ko jo rind kuchh chaTaa dein
masjid ki baghal mein mai-kada ho

khush raho yaar agar ham se ho bezaar bahut
dil agar apnaa salaamat hai to dildaar bahut

mire qatl par tum ne biiDaa uThaayaa
mire haath kaa paan khaayaa to hotaa

ham na kahte the hansi achchhi nahin
aa gai aakhir rukaavaT dekhiye

mire baghair na ik-dam use qaraar aataa
zaraa bhi zabt jo mujh be-qaraar mein hotaa

sau fasaad ek ishq mein uTThe
boyaa ik tukhm uge hazaar darakht

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

ik yaad ki maujudgi sah bhi nahin sakte
ye baat kisi aur se kah bhi nahin sakte

bosa-e-khaal-e-lab-e-jaanaan ki kaifiyyat na puchh
nashsha-e-mai se ziyaada nashsha-e-afyun huaa

sayyaad ke jigar mein kare thaa sinaan kaa kaam
murgh-e-qafas ke sar pe ye ehsaan-e-naala thaa

shaam hote hi khuli saDkon ki yaad aati hai
sochtaa roz huun main ghar se nahin niklungaa