jaane kyaa Thaan ke uThtaa huun nikalne ke liye — Irfan Siddiqi

bhuul jaaoge ki rahte the yahaan dusre log
kal phir aabaad kareinge ye makaan dusre log

sham-e-khema koi zanjir nahin ham-safaraan
jis ko jaanaa hai chalaa jaae ijaazat kaisi

us ki aankhein hain ki ik Dubne vaalaa insaan
dusre Dubne vaale ko pukaare jaise

khiraaj maang rahi hai vo shaah-baanu-e-shahr
so ham bhi hadiya-e-dast-e-talab guzaarte hain

hoshiyaari dil-e-naadaan bahut kartaa hai
ranj kam sahtaa hai elaan bahut kartaa hai

nafrat ke khazaane mein to kuchh bhi nahin baaqi
thoDaa saa guzaare ke liye pyaar bachaaein

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

us ke rukhsaar pe hai aur tire honT pe til
tilmilaane ki ijaazat nahin di jaaegi

ham ek fikr ke paikar hain ik khayaal ke phuul
tiraa vajud nahin hai to meraa saayaa nahin

raah aasaan dekh kar sab khush the phir main ne kahaa
soch liije ek andaaz-e-nazar meraa bhi hai

baazi-gaah-e-daar-o-rasan mein mai-kada-e-fikr-o-fan mein
ham rindon se raunaq hai ham durveshon se mele hain