us ne baarish mein bhi khiDki khol ke dekhaa nahin — Jamal Ehsani

isi ik baat par hai ittifaaq-o-ikhtilaaf us se
use aaina aur mujh ko piyaala achchhaa lagtaa hai

hazaar tarah ke the ranj pichhle mausam mein
par itnaa thaa ki koi saath rone vaalaa thaa

jo dil ke taaq mein tu ne charaagh rakkhaa thaa
na puchh main ne use kis tarah sitaara kiyaa

kisi bhi vaqt badal saktaa hai lamha koi
is qadar khush bhi na ho meri pareshaani par

vo log mere bahut pyaar karne vaale the
guzar gae hain jo mausam guzarne vaale the

vo bhi milne nai poshaak badal kar aayaa
main jo kal pairahan-e-khaak badal kar aayaa

pyaaso raho na dasht mein baarish ke muntazir
maaro zamin pe paanv ki paani nikal paDe

yuun to jal bujhne mein donon hain baraabar lekin
vo kahaan shama mein jo aag hai parvaane mein

raqib qatl huaa us ki tegh-e-abru se
haraam-zaada thaa achchhaa huaa halaal huaa

har qadam is mutabaadil se bhari duniyaa mein
raas aae to bas ik teri kami aae hamein

be-niyaazaana baraabar se guzarne vaale
tez kuchh qalb ki raftaar hui thi ki nahin

dhuup nikli hai baarishon ke baad
vo abhi ro ke muskuraae hain