aankhein jo uThaae to mohabbat kaa gumaan ho — Jan Nisar Akhtar

ye ilm kaa saudaa ye risaale ye kitaabein
ik shakhs ki yaadon ko bhulaane ke liye hain

ashaar mire yuun to zamaane ke liye hain
kuchh sher faqat un ko sunaane ke liye hain

zulfein siina naaf kamar
ek nadi mein kitne bhanvar

dil ko har lamha bachaate rahe jazbaat se ham
itne majbur rahe hain kabhi haalaat se ham

ishq mein kyaa nuqsaan nafa hai ham ko kyaa samjhaate ho
ham ne saari umr hi yaaro dil kaa kaarobaar kiyaa

itne maayus to haalaat nahin
log kis vaaste ghabraae hain

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

kuchh badan ke the taqaaze kuchh sharaarat dil ki thi
aaj lekin ishq apnaa jaavedaan hone ko thaa

lutf-e-sohbat mataa-e-ulfat hai
kuchh kaho aur kuchh suno pyaare

ek bose se muraad-e-dil-e-naashaad to do
kuchh na do haath se par munh se miri daad to do

ulfat mein teraa ronaa 'ehsaan' bahut bajaa hai
har vaqt meinh kaa honaa ye rahmat-e-khudaa hai