itne maayus to haalaat nahin — Jan Nisar Akhtar

ashaar mire yuun to zamaane ke liye hain
kuchh sher faqat un ko sunaane ke liye hain

zulfein siina naaf kamar
ek nadi mein kitne bhanvar

dil ko har lamha bachaate rahe jazbaat se ham
itne majbur rahe hain kabhi haalaat se ham

ishq mein kyaa nuqsaan nafa hai ham ko kyaa samjhaate ho
ham ne saari umr hi yaaro dil kaa kaarobaar kiyaa

tujhe baanhon mein bhar lene ki khvaahish yuun ubharti hai
ki main apni nazar mein aap rusvaa ho saa jaataa huun

ye ilm kaa saudaa ye risaale ye kitaabein
ik shakhs ki yaadon ko bhulaane ke liye hain

gham hai na ab khushi hai na ummid hai na yaas
sab se najaat paae zamaane guzar gae

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa