koi khayaal koi yaad koi to ehsaas — Javed Vashisht

aaj apne bhi paraae se nazar aate hain
pyaar ki rasm zamaane se uThi jaati hai

muddat se rahi farsh tiri raahguzar mein
tab jaa ke sitaaron se kahin aankh laDi hai

kaanTon pe chale hain to kahin phuul khile hain
phulon se mile hain to baDi choT lagi hai

ye to vaqt vaqt ki baat hai hamein un se koi gila nahin
vo hon aaj ham se khafaa khafaa kabhu ham se un ko bhi pyaar thaa

dard ki aanch banaa deti hai dil ko iksir
dard se dil hai agar dard nahin dil bhi nahin

gham se ehsaas kaa aaina jilaa paataa hai
aur gham sikhe hai aa kar ye saliqa mujh se

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

yaad nahin kyaa kyaa dekhaa thaa saare manzar bhuul gae
us ki galiyon se jab lauTe apnaa bhi ghar bhuul gae

aa gayaa yaad unhein apne kisi gham kaa hisaab
hansne vaalon ne mire ashk jo gin ke dekhe

jab jab tum ko yaad karein ham
tab tab baarish ho jaati hai

ba-zaahir dasht ki jaanib to baDhtaa jaa rahaa hai
magar sab raaste bhi yaad kartaa jaa rahaa hai