ham na piyeinge bhiik ki saaqi — Kaif Bhopali

chaahtaa huun phunk duun is shahr ko
shahr mein in kaa bhi ghar hai kyaa karun

kaise maanein ki unhein bhuul gayaa tu ai 'kaif'
un ke khat aaj hamein tere sirhaane se mile

mai-kasho aage baDho tishna-labo aage baDho
apnaa haq maangaa nahin jaataa hai chhinaa jaae hai

kyaa koi mohabbat mein yuun bhi benaam-o-nishaan ho jaataa hai
main huun ki abhi tak zinda huun duniyaa hai ki bhuli jaati hai

allaah ye kis kaa maatam hai vo zulf jo bikhri jaati hai
aankhein hai ki bhigi jaati hain duniyaa hai ki Duubi jaati hai

mat dekh ki phirtaa huun tire hijr mein zinda
ye puchh ki jiine mein maza hai ki nahin hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

maarka garm to ho lene do khun-rezi kaa
pahle shamshir ke niche hamin jaa baiTheinge