kis tarah ishq-e-majaazi ko haqiqi kar luun — Kaleem Ahmadabadi

gham natija hai khushi ki intihaa kaa ai 'kalim'
dil ki ik ik mauj mauj-e-shaadmaani ho to kyaa

jaane kyaa bhar di hain us ne is chaman mein shokhiyaan
jo bhi aayaa vo chaman kaa raaz-daan bantaa gayaa

tumhin bataao ki is dil kaa kyaa kiyaa jaae
jo choT khaa ke bhi choTon se aashnaa na huaa

sitaare toD liye ham ne zuhd-o-taqvaa ke
magar jo haqq-e-ibaadat thaa vo adaa na huaa

ham to baiThe hi rahe apni asiri ko liye
banne vaalaa kaam be-vahm-o-gumaan bantaa gayaa

sard aahon kaa tasarruf ho to soz-e-dil kahaan
dil se jo shoala uThaa vo bhi dhuaan bantaa gayaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

sach bataa ishq mujhe sakht pareshaan huun main
kyuun khafaa hotaa nahin dost khataa par meri

jis ki havas ke vaaste duniyaa hui aziiz
vaapas hue to us ki mohabbat khafaa mili

ye baat baat pe zaahid jo TuuT jaataa hai
dil-e-hazin bhi hamaaraa tiraa vuzu kyaa hai