saamnaa aaj anaa se hogaa — Kalidas Gupta Raza

azal se taa-ba-abad ek hi kahaani hai
isi se ham ko nai daastaan banaani hai

ham na maaneinge khamoshi hai tamannaa kaa mizaaj
haan bhari bazm mein vo bol na paai hogi

ab koi DhunD-DhaanD ke laao nayaa vajud
insaan to bulandi-e-insaan se ghaT gayaa

duniyaa to sidhi hai lekin duniyaa vaale
jhuTi sachchi kah ke use bahkaate honge

hayaat laakh ho faani magar ye sun rakhiye
hayaat se jo hai maqsud ghair-faani hai

zamaana husn nazaakat balaa jafaa shokhi
simaT ke aa gae sab aap ki adaaon mein

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

us ko khonaa asl mein us ko paanaa hai
haasil kaa hi partav hai laa-haasil mein

zindagi sundar ghazal hai dosto
zindagi ko gungunaanaa chaahiye

us but-e-kaafir kaa zaahid ne bhi naam aisaa japaa
daana-e-tasbih har ik raam-daanaa ho gayaa

ku-e-jaanaan mein na ghairon ki rasaai ho jaae
apni jaagir ye yaa-rab na paraai ho jaae