bane hain kaam sab uljhan se mere — Kashif Husain Ghair

na ham vahshat mein apne ghar se nikle
na sahraa apni viraani se niklaa

zindagi mein kasak zaruri thi
ye khalaa pur tiri kami se huaa

haal puchhaa na kare haath milaayaa na kare
main isi dhuup mein khush huun koi saaya na kare

kyaa chaahti hai ham se hamaari ye zindagi
kyaa qarz hai jo ham se adaa ho nahin rahaa

hamaari zindagi par maut bhi hairaan hai 'ghaaer'
na jaane kis ne ye taarikh-e-paidaaish nikaali hai

mere andar kaa shor hai mujh mein
varna baahar to khaamushi hai yahaan

main baDaa ho gayaa huun magar bachpanaa
mere dil se kabhi bhi gayaa hi nahin

ek aavaaz main ne suni thi abhi kaun bolaa thaa ye to khabar hi nahin
ye ta'alluq zaruri hai kis ne kahaa vo bhi khaamosh thaa main bhi khaamosh thi

maslahat thi koi vo chup the agar
bolne vaale to khul kar bolte

main chup rahaa to aankh se aansu ubal paDe
jab bolne lagaa miri aavaaz phaT gai

ye dar-o-divaar par be-naam se chup-chaap saae
phulon raston aur bachchon ki hifaazat chaahte hain

chhoD aayaa huun pichhe sab aavaazon ko
khaamoshi mein daakhil hone vaalaa huun