phuul se baas judaa fikr se ehsaas judaa — Khalid Ahmad

tark-e-taalluqaat pe royaa na tu na main
lekin ye kyaa ki chain se soyaa na tu na main

vo gali ham se chhuTti hi nahin
kyaa karein aas TuTti hi nahin

qumqumon ki tarah qahqahe jal bujhe
mez par chaae ki pyaaliyaan rah gaiin

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

log ye soch ke hi pareshaan hain
main zamin thaa to kyuun aasmaan ho gayaa

kuchh vaqt chaahte the ki sochein tire liye
tu ne vo vaqt ham ko zamaane nahin diyaa

tanhaa khaDaa huun main bhi sar-e-karbalaa-e-asr
aur sochtaa huun mere taraf-daar kyaa hue

koi to hai 'munir' jise fikr hai miri
ye jaan kar ajiib si hairat hui mujhe