log ye soch ke hi pareshaan hain — Akhtar Shahjahanpuri

dilon mein karb baDhtaa jaa rahaa hai
magar chehre abhi shaadaab se hain

abhi tahzib kaa nauha na likhnaa
abhi kuchh log urdu bolte hain

ye moajiza hamaare hi tarz-e-bayaan kaa thaa
us ne vo sun liyaa thaa jo ham ne kahaa na thaa

apnon se jang hai to bhale haar jaaun main
lekin main apne saath sipaahi na laaungaa

koi manzar nahin barsaat ke mausam mein bhi
us ki zulfon se phisalti hui dhupon jaisaa

ranj-o-gham sahne ki aadat ho gai hai
zinda rahne ke saliqe de gayaa vo

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

kis soch mein hain aaine ko aap dekh kar
meri taraf to dekhiye sarkaar kyaa huaa

ye naqli sajde ye dast-bosi ye jhuTi 'izzat tumhein mubaarak
ham ek miTTi ke aadmi hain mazaar hone se Dar rahe hain

ghaayal vajud soch ki baisaakhiyaan liye
milne chalaa hai guzre hue maah-o-saal se

ye soch kar tiri mahfil se ham chale aae
ki ek baar to baDh jaae hausla dil kaa