main ne tujh ko manzil jaanaa — Khalid Moin

lakirein khinchte rahne se ban gai tasvir
koi bhi kaam ho, be-kaar thoDi hotaa hai

haath chhuDaa kar jaane vaale
main tujh ko apnaa samjhaa thaa

munkashif! aaj talak ho na sakaa
main khalaa huun ki khalaa hai mujh mein

mohabbat ki to koi had, koi sarhad nahin hoti
hamaare darmiyaan ye faasle, kaise nikal aae

ajab pur-lutf manzar dekhtaa rahtaa huun baarish mein
badan jaltaa hai aur main bhigtaa rahtaa huun baarish mein

is shahr-e-fusun-gar ke azaab aur, savaab aur
hijr aur tarah kaa hai, visaal aur tarah kaa

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

miTaane vaale hamaaraa hi ghar miTaanaa thaa
chaman mein ek se ek achchhaa aashiyaanaa thaa

be-khudi kucha-e-jaanaan mein liye jaati hai
dekhiye kaun mujhe meri khabar detaa hai

saaat-e-isviyaan hai ki miraa dil jis mein
khud-ba-khud choT lagi khud-ba-khud aavaaz hui

ab tum se kyaa kisi se shikaayat nahin mujhe
tum kyaa badal gae ki zamaanaa badal gayaa