ragon mein zahr-e-khamoshi utarne se zaraa pahle — Khushbir Singh Shaad

bhanvar jab bhi kisi majbur kashti ko Dubotaa hai
to apni bebasi par duur se saahil taDaptaa hai

ye teraa taaj nahin hai hamaari pagDi hai
ye sar ke saath hi utregi sar kaa hissa hai

'shaad' itni baDh gai hain mere dil ki vahshatein
ab junun mein dasht aur ghar ek jaise ho gae

yahi qatre banaate hain kabhi to ghaas par moti
kabhi shabnam ko ye simaab mein tabdil karte hain

rafta rafta sab tasvirein dhundli hone lagti hain
kitne chehre ek puraane album mein mar jaate hain

ab andheron mein jo ham khauf-zada baiThe hain
kyaa kahein khud hi charaaghon ko bujhaa baiThe hain

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

aakhir taDap taDap ke ye khaamosh ho gayaa
dil ko sukun mil hi gayaa iztiraab mein

shor machaa deti hai us ki khaamoshi
bole to phir sannaaTaa chhaa jaataa hai

aur is se pahle ki saabit ho jurm-e-khaamoshi
ham apni raae kaa izhaar karnaa chaahte hain

aaina chupke se manzar vo churaa letaa hai
tu sajaataa hai badan jab kabhi uryaani se