ab andheron mein jo ham khauf-zada baiThe hain — Khushbir Singh Shaad

ye teraa taaj nahin hai hamaari pagDi hai
ye sar ke saath hi utregi sar kaa hissa hai

'shaad' itni baDh gai hain mere dil ki vahshatein
ab junun mein dasht aur ghar ek jaise ho gae

yahi qatre banaate hain kabhi to ghaas par moti
kabhi shabnam ko ye simaab mein tabdil karte hain

rafta rafta sab tasvirein dhundli hone lagti hain
kitne chehre ek puraane album mein mar jaate hain

nai mushkil koi darpesh har mushkil se aage hai
safar divaangi kaa ishq ki manzil se aage hai

bhanvar jab bhi kisi majbur kashti ko Dubotaa hai
to apni bebasi par duur se saahil taDaptaa hai

ik khauf saa darakhton pe taari thaa raat-bhar
patte laraz rahe the havaa ke baghair bhi

murda aankhein dekhne se baDh ke vahshat-naak hai
zinda aankhon mein kisi ki maut kaa Dar dekhnaa

kai to miT gae kitne khanDar bane hue hain
makaan apne makinon ki sogvaari mein

meri apni zaat hi ik anjuman se kam na thi
is liye 'sajjaad' mujh ko khauf-e-tanhaai na thaa

kahin aankhein kahin baazu kahin se sar nikal aae
andheraa phailte hi har taraf se Dar nikal aae

khauf aankhon mein miri dekh ke chingaari kaa
kar diyaa raat ne suraj ke havaale mujh ko