'chandaa' rahe partav se tire yaa ali raushan — Mah Laqa Chanda

tiir o talvaar se baDh kar hai tiri tirchhi nigah
saikDon aashiqon kaa khuun kiye baiThi hai

garche gul ki sej ho tis par bhi uD jaati hai niind
sar rakhun qadmon pe jab tere mujhe aati hai niind

ba-juz haq ke nahin hai ghair se hargiz tavaqqo kuchh
magar duniyaa ke logon mein mujhe hai pyaar se matlab

gul ke hone ki tavaqqoa pe jiye baiThi hai
har kali jaan ko muTThi mein liye baiThi hai

kabhi sayyaad kaa khaTkaa hai kabhi khauf-e-khizaan
bulbul ab jaan hatheli pe liye baiThi hai

sang-e-rah huun ek Thokar ke liye
tis pe vo daaman sambhaal aataa hai aaj

aankhon mein meri subh-e-qayaamat gai jhamak
siine se us pari ke jo parda ulaT gayaa

huaa kyaa ai nasim-e-subh-gaahi
jo murjhaayaa huaa dil kaa kanval hai

din bhi hai raat bhi hai subh bhi hai shaam bhi hai
itne vaqton mein koi vaqt-e-mulaaqaat bhi hai

kyaa shai hai khinch leti hai shab ko sar-e-falak
phir subh joDti hai dobaara zamin se

shab-e-gham kaa miraa ik saath qissa mukhtasar honaa
udhar dam toDnaa meraa idhar paidaa sahar honaa

sahar ke saath hogaa chaak meraa daaman-e-hasti
ba-rang-e-shama bazm-e-dahr mein mehmaan huun shab bhar kaa