ek din vo zarron ko aaftaab kar leinge — Mahfuzur Rahman Adil

usi ne bakhshaa hai mujh ko shuur jiine kaa
jo mushkilon ki ghaDi baar baar aai hai

vo miri aavaaragardi vo miraa divaana-pan
vo miri taazim mein divaar-o-dar kaa jaagnaa

zindagi ko hausla dene ke khaatir
khvaahishon ko reza reza chun rahaa huun

khud mire aansu chamak rakhte hain gauhar ki tarah
meri chashm-e-aarzu mein maah-o-akhtar kuchh nahin

aaftaab-e-garm se dast-o-garebaan ho gae
dhuup ki shiddat se saae jab pareshaan ho gae

tumhaare bakhshe hue aansuon ke qatron se
shab-e-firaaq mein taare sajaa rahaa huun main

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

baad-e-shaam aae mahak uTThe miraa sahn riyaaz
be-mahak jhaaDiyon se raat ki raani nikle

roz ik taaza qasida nai tashbib ke saath
rizq bar-haq hai ye khidmat nahin hogi ham se

rukh pe aa jaataa hai jis roz tamanna kaa bukhaar
raat ho jaati hai chehra mujhe dhote dhote