muddaton baad ham kisi se mile — Makhmoor Saeedi

dil pe ik gham ki ghaTaa chhaai hui thi kab se
aaj un se jo mile TuuT ke barsaat hui

bas yunhi ham-sari-e-ahl-e-jahaan mumkin hai
dam-ba-dam apni bulandi se utartaa jaaun

'makhmur' kaisi raah thi ham jis pe chal paDe
aai thi jis taraf se usi samt phir gai

main us ke vaade kaa ab bhi yaqin kartaa huun
hazaar baar jise aazmaa liyaa main ne

ho jaae jahaan shaam vahin un kaa baseraa
aavaara parindon ke Thikaane nahin hote

maslahat ke hazaar parde hain
mere chehre pe kitne chehre hain

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

fikr-e-fardaa gham-e-imroz gham-e-maut-o-hayaat
aadmi kyaa huaa majmua-e-aalaam huaa

jo kah rahe the ki jiinaa muhaal hai tum bin
bichhaD ke mujh se vo do din udaas bhi na rahe

tum mil gae to koi gila ab nahin rahaa
main apni zindagi se khafaa ab nahin rahaa