main us ke vaade kaa ab bhi yaqin kartaa huun — Makhmoor Saeedi

dil pe ik gham ki ghaTaa chhaai hui thi kab se
aaj un se jo mile TuuT ke barsaat hui

bas yunhi ham-sari-e-ahl-e-jahaan mumkin hai
dam-ba-dam apni bulandi se utartaa jaaun

'makhmur' kaisi raah thi ham jis pe chal paDe
aai thi jis taraf se usi samt phir gai

ho jaae jahaan shaam vahin un kaa baseraa
aavaara parindon ke Thikaane nahin hote

ghar mein rahaa thaa kaun ki rukhsat kare hamein
chaukhaT ko alvidaaa kahaa aur chal paDe

maslahat ke hazaar parde hain
mere chehre pe kitne chehre hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne