main tinke chuntaa phirtaa huun sayyaad tiliyaan — Manzar Lakhnavi

ahl-e-mahshar dekh luun qaatil ko to pahchaan luun
bholi-bhaali shakl thi aur kuchh bhalaa saa naam thaa

hain sau tariqe aur bhi ai be-qaraar dil
izhaar-e-shikva shikve ke andaaz mein na ho

in se jab puchhaa gayaa bismil tumhaare kyaa karein
hans ke bole zakhm-e-dil dekhaa karein royaa karein

kam-sini kyaa kam thi is par qahr hai shakki mizaaj
apnaa naavak mere dil se khinch kar dekhaa kiye

kisi aankh mein niind aae to jaanun
miraa qissa-e-gham kahaani nahin hai

vo to kahiye aap ki ulfat mein dil bahlaa rahaa
varna duniyaa chaar din bhi rahne ke qaabil na thi

jab ki pahlu se yaar uThtaa hai
dard be-ikhtiyaar uThtaa hai

idhar aa ham dikhaate hain ghazal kaa aaina tujh ko
ye kis ne kah diyaa gesu tire barham nahin pyaare

dushmanon se pashemaan honaa paDaa hai
doston kaa khulus aazmaane ke baad

ku-e-jaanaan mein na ghairon ki rasaai ho jaae
apni jaagir ye yaa-rab na paraai ho jaae

kucha-e-yaar mein rahne se nahin aur husul
ishq hai mujh ko ik us ke dar-o-divaar ke saath

gar aur bhi miri turbat pe yaar Thahregaa
to zer-e-khaak na ye be-qaraar Thahregaa