kisi aankh mein niind aae to jaanun — Manzar Lakhnavi

muddaton baa'd kabhi ai nazar aane vaale
iid kaa chaand na dekhaa tiri surat dekhi

hain sau tariqe aur bhi ai be-qaraar dil
izhaar-e-shikva shikve ke andaaz mein na ho

in se jab puchhaa gayaa bismil tumhaare kyaa karein
hans ke bole zakhm-e-dil dekhaa karein royaa karein

kam-sini kyaa kam thi is par qahr hai shakki mizaaj
apnaa naavak mere dil se khinch kar dekhaa kiye

daaman-o-jeb-o-garebaan kaa nahin koi malaal
gham ye hai dast-e-junun kal ke liye kaam nahin

ahl-e-mahshar dekh luun qaatil ko to pahchaan luun
bholi-bhaali shakl thi aur kuchh bhalaa saa naam thaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

nashaat-e-husn ho josh-e-vafaa ho yaa gham-e-ishq
hamaare dil mein jo aae vo aarzu ho jaae

dil miraa dard ke sivaa kyaa hai
ibtidaa ye to intihaa kyaa hai

aisaa na ho ye dard bane dard-e-laa-davaa
aisaa na ho ki tum bhi mudaavaa na kar sako