zakhm detaa hai har koi 'tanhaa' — Masood Tanha

bahut khaamosh rahtaa hai jo 'tanhaa'
vo mahfil mein baraabar boltaa hai

bazm-e-yaaraan mein baiThtaa huun magar
meri jaanib harif dekhte hain

shahr mein raunaqein sahi 'tanhaa'
apne gaanv se mat kinaaraa kar

dost hi khubiyaan bataate hain
dost hi khaamiyaan nikaalte hain

ye tamaashaa sar-e-baazaar nahin ho saktaa
har koi meraa kharidaar nahin ho saktaa

yaadon ke qaafile mein udaasi thi ham-rikaab
hijrat mein tere shahr se 'tanhaa' nahin gae

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

rumuz-e-ishq-o-mohabbat se aashnaa huun main
kisi ko gham-zada dekhaa to ro diyaa huun main

gham ki tashrih hansi-khel nahin hai koi
pahle insaan tu bin phir ye hunar paidaa kar

tiri samajh mein na aa sakegi kisi ke ashkon ki qadr-o-qimat
abhi hai naa-aashnaa-e-gham tu abhi tiraa dil dukhaa nahin hai