agarche kahne ko kal kaaenaat apni thi — Masooda Hayat

khushbu si koi aae to lagtaa hai ki tum ho
shisha kahin Takraae to lagtaa hai ki tum ho

kyaa gharaz ham ko vahaan ab koi bhi aabaad ho
ham to us basti se ghar apnaa uThaa kar le gae

ghar se jo shakhs bhi nikle vo sambhal kar nikle
jaane kis moD pe kis haath mein khanjar nikle

kis se shikva karein viraani-e-hasti kaa 'hayaat'
ham ne khud apni tamannaaon ko jiine na diyaa

hazaar shauq numaayaan the jis nazar se kabhi
vahi nigaah baDi ajnabi si lagti hai

hazaar dard sameTe hue huun ik dil mein
bikhar gai jo miri daastaan to kyaa hogaa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

uryaan na vo nahaayaa hammaam ho ki dariyaa
chashm-e-hubaab ne bhi us kaa badan na dekhaa

hamein ranjish nahin dariyaa se koi
salaamat gar rahe sahraa hamaaraa

tire ehsaas mein Duubaa huaa main
kabhi sahraa kabhi dariyaa huaa main

jaane kab tufaan bane aur rastaa rastaa bichh jaae
band banaa kar so mat jaanaa dariyaa aakhir dariyaa hai

diyaa bujhaane ki fitrat badal bhi sakti hai
koi charaagh havaa par dabaao to Daale