hazaar dard sameTe hue huun ik dil mein — Masooda Hayat

khushbu si koi aae to lagtaa hai ki tum ho
shisha kahin Takraae to lagtaa hai ki tum ho

kyaa gharaz ham ko vahaan ab koi bhi aabaad ho
ham to us basti se ghar apnaa uThaa kar le gae

ghar se jo shakhs bhi nikle vo sambhal kar nikle
jaane kis moD pe kis haath mein khanjar nikle

kis se shikva karein viraani-e-hasti kaa 'hayaat'
ham ne khud apni tamannaaon ko jiine na diyaa

hazaar shauq numaayaan the jis nazar se kabhi
vahi nigaah baDi ajnabi si lagti hai

ek khushbu si ubharti hai nafas se mere
ho na ho aaj koi aan basaa hai mujh mein

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

jis taraf baiThte the vasl mein aap
usi pahlu mein dard rahtaa hai

ghamon par us ke kabhi e'tibaar mat karnaa
vo pyaaz kaaT ke aansu nikaal letaa hai

kaun se dukh ko palle baandhein kis gham ko tahrir karein
yaan to dard sivaa hotaa hai aur bhi arz-e-haal ke baad