us ke dar par to kisi ki bhi rasaai na hui — Meer Mehdi Majrooh

kisi se ishq apnaa kyaa chhupaaein
mohabbat Tapki paDti hai nazar se

shaghl-e-ulfat ko jo ahbaab buraa kahte hain
kuchh samajh mein nahin aataa ki ye kyaa kahte hain

itnaa mardud huun ki Dar hai mujhe
qabr se pheink de zamin na kahin

apni kashti kaa hai khudaa haafiz
pichhe tufaan hai saamne girdaab

kyuun paas mire aa kar yuun baiThe ho munh phere
kyaa lab tire misri hain main jin ko chabaa jaataa

churaa ke muTThi mein dil ko chhupaae baiThe hain
bahaanaa ye hai ki mehndi lagaae baiThe hain

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

hamein tanhaaiyon mein yuun to kyaa kyaa yaad aataa hai
magar sach puchhiye to ek chehraa yaad aataa hai

rah-e-ishq-o-vafaa bhi kucha-o-baazaar ho jaise
kabhi jo ho nahin paataa vo saudaa yaad aataa hai

ishq ko husn ke atvaar se kyaa nisbat hai
vo hamein bhuul gae ham to unhein yaad karein

pahle us ko yaad kiyaa hai
phir aansu ijaad kiyaa hai