zard se sabz hotaa jaataa hai — Mehar Ali

us ek lamhe mein ai dost saath saath hain ham
vo ek lamha jo imkaan mein nahin aayaa

ye soch kar vujud faraamosh kar diyaa
khud se milaa to teri tamanna karungaa main

main nahin jaantaa kahaan huun main
in dinon khud se raabta hi nahin

ik 'umr tere saath chalaa bhi to kyaa milaa
ab sochtaa huun tujh se bichhaD kar hi dekh luun

mujh mein ab meri jagah baaqi nahin
main tiri maujudgi se bhar gayaa

anginat naqsh banaa leinge ye naqqaash magar
husn mahtaab kaa mahtaab mein rah jaaegaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

muntazir huun tiri aavaaz se tasvir talak
ek vaqfa hi to darkaar thaa milne ke liye

sukun vasl mein itnaa nasib ho ki na ho
jis iztiraab se main intizaar kartaa huun

ye aarzu ke sitaare ye intizaar ke phuul
chamak rahi hain khataaein mahak rahe hain gunaah

teri aamad ki muntazir aankhein
bujh gaiin khaak ho gae raste