main nahin jaantaa kahaan huun main — Mehar Ali

us ek lamhe mein ai dost saath saath hain ham
vo ek lamha jo imkaan mein nahin aayaa

ye soch kar vujud faraamosh kar diyaa
khud se milaa to teri tamanna karungaa main

ik 'umr tere saath chalaa bhi to kyaa milaa
ab sochtaa huun tujh se bichhaD kar hi dekh luun

zard se sabz hotaa jaataa hai
ik shajar intizaar se niklaa

mujh mein ab meri jagah baaqi nahin
main tiri maujudgi se bhar gayaa

anginat naqsh banaa leinge ye naqqaash magar
husn mahtaab kaa mahtaab mein rah jaaegaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

kai sitaaron ko main jaantaa huun bachpan se
kahin bhi jaaun mire saath saath chalte hain