mujh ko thakne nahin detaa ye zarurat kaa pahaaD — Meraj Faizabadi

yuun huaa phir band kar liin us ne aankhein ek din
vo samajh letaa thaa dil kaa haal chehra dekh kar

pyaas kahti hai chalo ret nichoDi jaae
apne hisse mein samundar nahin aane vaalaa

aaj bhi gaanv mein kuchh kachche makaanon vaale
ghar mein ham-saae ke faaqa nahin hone dete

shaaeri mein 'mir'-o-'ghaalib' ke zamaana ab kahaan
shohratein jab itni sasti hon adab dekhegaa kaun

zindagi di hai to jiine kaa hunar bhi denaa
paanv bakhshein hain to taufiq-e-safar bhi denaa

jo kah rahe the ki jiinaa muhaal hai tum bin
bichhaD ke mujh se vo do din udaas bhi na rahe

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

sab ko qudrat thi khush-kalaami par
khaamushi mein zabaan-daraaz thaa main

band ho jaataa hai kuuze mein kabhi dariyaa bhi
aur kabhi qatra samundar mein badal jaataa hai

aaThon pahr lahu mein nahaayaa kare koi
yuun bhi na apne dard ko dariyaa kare koi

zabt-e-gham kaa mire andaaza bhalaa kyaa hotaa
main agar dasht na hotaa bhi to dariyaa hotaa

ye soch ke daanista rahaa us se bahut duur
maghrur hai dariyaa mujhe pyaasaa na samajh le