darmiyaan garche hijaabaat nahin duuri ke — Minhaj Ali

yahi hai vaqt ki ji bhar ke dekh luun us ko
vo saamne hai magar dekhtaa nahin hai mujhe

didaar kaa visaal mein aayaa na koi lutf
us rukh pe be-rukhi ke the parde paDe hue

ghaur se dekh gulshan-e-duniyaa
har taraf khvaahishon kaa daldal hai

bajaa ki raunaq-e-mahfil abhi uruuj pe hai
main kyaa karun miri khalvat bulaa rahi hai mujhe

gulshan-e-dahr se khushbu ki tarah guzraa main
sab ko mahkaayaa magar apni numaaish nahin ki

in duriyon ne aur baDhaa di hain qurbatein
sab faasle vabaa ki tavaalat se miT gae

ye paDi hain sadiyon se kis liye tire mere beach judaaiyaan
kabhi apne ghar tu mujhe bulaa kabhi raaste mire ghar ke dekh

vo paas ho ke duur hai to duur ho ke paas
firaaq aur visaal hain ajiib ajiib se

hijr mein vaise bhi aati hai musibat jaan par
par raqibon ki alag hai khanda-kaari haae haae

firaaq-rut mein bhi kuchh lazzatein visaal ki hain
khayaal hi mein tire khaal-o-khad ubhaaraa karein

kabhi kabhi to ye dil mein savaal uThtaa hai
ki is judaai mein kyaa us ne paa liyaa hogaa