in duriyon ne aur baDhaa di hain qurbatein — Aitbar Sajid

abhi rail ke safar mein hain bahut nihaal donon
kahin rog ban na jaae yahi saath do ghaDi kaa

kisi ko saal-e-nau ki kyaa mubaarakbaad di jaae
calender ke badalne se muqaddar kab badaltaa hai

ab to khud apni zarurat bhi nahin hai ham ko
vo bhi din the ki kabhi teri zarurat ham the

ek hi shahr mein rahnaa hai magar milnaa nahin
dekhte hain ye aziyyat bhi gavaara kar ke

guftugu der se jaari hai natije ke baghair
ik nai baat nikal aati hai har baat ke saath

phuul the rang the lamhon ki sabaahat ham the
aise zinda the ki jiine ki alaamat ham the

tujh se bichhaDnaa koi nayaa haadsa nahin
aise hazaaron qisse hamaari khabar mein hain

kis ke badan ki narmiyaan haathon ko gudgudaa gaiin
dasht-e-firaaq-e-yaar ko pahlu-e-yaar kar diyaa

sitaaron ki gardish dilon kaa bichhaDnaa
ye kaise khudaa ki hai kaisi khudaai

duriyaan tum ne hi baDhaai thiin
ham to apni jagah pe Thahre hain

ham tum mein kal duuri bhi ho sakti hai
vajh koi majburi bhi ho sakti hai

garmi lagi to khud se alag ho ke so gae
sardi lagi to khud ko dobaara pahan liyaa