jo mere banne se pahle ik intizaar banaa — Miraash

thi kal dayaar-e-'ishq mein 'iduzzuhaa 'miraash'
ham kyaa galaa kaTaate 'ajab bheD-chaal thi

ghar palaT kar jo miri raushan-khayaali aai hai
shor hai shahr-e-sukhan mein phir divaali aai hai

khanak rahaa huun main nashshe mein chaabiyon ki tarah
khuli hai pyaas magar mai-kade pe taalaa hai

kis gardish-e-paiham mein miraa sho’la-e-dil hai
jaltaa hai lahu roghan-e-khurshid ki surat

khutut aag mein jalte hain aur sikhon par
kisi kaa dil to jigar hai kisi parinde kaa

gard aainon ki chaaron taraf hai jami hui
'aalam 'ajib shisha-gari ki dukaan hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

tark-e-ulfat ke baa'd bhi 'ashfaaq'
teraa rahtaa hai intizaar mujhe

ye ek lamhe ki duuri bahut hai mere liye
tamaam umr tiraa intizaar karne ko

shab-e-firaaq ki zulmat hai naa-gavaar mujhe
naqaab uThaa ki sahar kaa hai intizaar mujhe

ye intizaar nahin shama hai rifaaqat ki
is intizaar se tanhaai khub-surat hai