shab-e-firaaq ki zulmat hai naa-gavaar mujhe — Anwar Sabri

zulmaton mein raushni ki justuju karte raho
zindagi bhar zindagi ki justuju karte raho

uf vo maasum o hayaa-rez nigaahein jin par
qatl ke baad bhi ilzaam nahin aataa hai

main jo royaa un ki aankhon mein bhi aansu aa gae
husn ki fitrat mein shaamil hai mohabbat kaa mizaaj

tamaam umr qafas mein guzaar di ham ne
khabar nahin ki nasheman ki zindagi kyaa hai

vaqt jab karvaTein badaltaa hai
fitna-e-hashr saath chaltaa hai

meri nigaah-e-fikr mein 'anvar'
ishq fasaana husn hai uryaan

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

fareb-khurda hai itnaa ki mere dil ko abhi
tum aa chuke ho magar intizaar baaqi hai

main muntazir huun teri tamannaa liye hue
aa jaa farogh-e-husn ki duniyaa liye hue

nigaahein muntazir hain kis ki dil ko justuju kyaa hai
mujhe khud bhi nahin maalum meri aarzu kyaa hai